O deputado do BNG no Congreso, Néstor Rego, rexistrou varias iniciativas para que o Goberno central impulse as medidas necesarias para garantir que o alumnado da UNED poida realizar os seus exames na lingua oficial do seu territorio distinta do español.

"Os recentes suspensos do alumnado unicamente por usar o galego, non poden volver producirse e o Ministerio de Universidades debe actuar para garantir que, en cumprimento coa lei, o alumnado poida usar a lingua oficial da súa elección", denunciou Rego.

Segundo informou o BNG, houbo alumnado da UNED que, por responder o seu exame en galego nun centro de Galicia, "suspendeu co único argumento" do profesor responsable, durante a revisión, que o equipo docente "non ten competencia nin instrumentos" para avaliar unha proba redactada nun idioma diferente ao castelán e que, en consecuencia, "non ten a obrigación de corrixilo".

"Non podemos entender que continúe suspendendo ao alumnado por escribir en galego en Galicia. A UNED, como universidade pública, debería promover e respectar a oficialidade do galego", sinalou Rego.

Sobre todo, cando nos propios estatutos da universidade asume como "misións fundamentais" a "inserción e coordinación" entre os diferentes centros asociados de cada unha das comunidades autónomas, así como "o apoio ás linguas e culturas de España" e colaborará coas Administracións autonómicas para "a difusión da lingua, a cultura e o mellor servizo aos cidadáns en educación superior".

No regulamento das probas presenciais da UNED aprobadas polo consello de goberno, explicou Rego, "non se prohibe, en ningún caso", a realización das probas nas linguas oficiais diferentes do español. "Mesmo, a lei establece que os profesores e o alumnado do nivel universitario teñen o dereito a usar, oralmente e por escrito, a lingua oficial da súa preferencia", reivindicou o deputado do BNG.